Темур Зулфиқоров 

... Вақте ки Пайғамбар – Саллаллоҳи алайҳи васаллам – Раҳмати Аллоҳ бод бар Ӯ – бо одам салом мекард – ҳеҷ вақт аввал дасти худро намекашид, то наранҷонад...

Пайғамбар – Раҳмати Аллоҳ бод бар ӯ – ҳамеша даъватро қабул мекард – ҳатто даъвати одитарин одамҳоро... Ба ҳеҷ кас ҷавоби рад намедод...

... Дар ин дунё ҳамчун хориҷӣ зиндагӣ кун... ҳамчун мусофир...

Темур Зулфиқоров

            Боре корвони Пайғамбар – раҳмати Аллоҳ бод бар Ӯ – дар боди самуми биёбони Саҳрои Кабир, ки беҳадду канор мехурӯшиду меҷӯшиду гард мепошиду мепароканид, роҳ гум кард

         Пайғамбар, ҳамсафарони қудсӣ  – саҳобагон ва шутурҳои Ӯ рӯзҳои бисёре дар биёбони хурӯшону ҷӯшон гуруснаву кӯр-кӯронаву ғамгин мегаштанд, овораву саргардон

         Он гоҳ Пайғамбар фармон дод, ки шоҳшутури корвонро сар бизананд, то бо гӯшти фарбеҳи он ҳамсафарони афсурдаву пажмурдаро сер кунанд ва бо хунаш сероб созанд лабу даҳони хушку шӯрбастаи ононро

         Вақте ки шутурро пора-пора карданд,  муталошӣ карданд, бахш-бахш карданд, аз ҳам ҷудо карданд – дар он на узвҳои дарунӣ, на хун, на гӯшт, на устухон ёфтанд, ҳама яклахт реги ҷӯшон буду ғафсу ногузаро

         Шутур тамом аз рег сиришта шуда буд ва реги шутур ба регзори беҳадду канори биёбон мерехту меомехт ва аз шутур намонд ному нишоне

         Шутур гӯиё соати регӣ бошад, ки рехту биёбон шуд

         Ҳамсафарони Пайғамбар ба даҳшат омаданду ларзиданд, вале Пайғамбар гуфт:

• Ҳамчунон ки ин шутури муқаддас – киштии қадими биёбон танҳо аз рег мураккаб буд – ҳамин тавр инсони асил ҳам танҳо аз дуо иборат аст! бале! Аллоҳу Акбар! Аллоҳ бузург аст!

Ва корвон дар биёбон ҳама бо як дил ба дуо пардохт.

Ҳамон ҳангом аз байни регҳои азҳамҷудошаванда  росту уреб гулханҳову чоҳҳои отифӣ афрӯхта мегаштанду сар мезаданду офарида мешуданд бо марғзорони наҷотбахш...

                                                                           Тарҷумаи Аскар Ҳаким

А. Коломиетс (Нависандаи украин)

ФАРИШТАИ ВАҲШӢ

(Намоишнома иборат аз ду парда)

ИШТИРОККУНАНДАГОН:

Ангел Платон Никитич

Уляна               – зани ӯ

Пётр

Фёдр                – писарони онҳо

Павлик            

Таня                  – духтарашон

Лида                 – зани Пётр

Оля                   – зани Павлик

Клава               – духтури участка

Рангмол           – шавҳари Клава

НАМОИШИ ДУЮМ

Ҳавлӣ. Платон устогӣ мекунад. Крячко медарояд.

Крячко (ба нимкатча мешинад). Нӯшиданӣ бидеҳ.

Платон (ба шиша ишора карда). Бинӯш, агар монда бошад.

Крячко. Не, аз ин не. Валерианка... Доруи дил...

Платон ба хона даромад.

Акнун зуд-зуд мегирад. (Шишаро мегирад). Онҳо чӣ менӯшанд? Шояд ба рангмол ширинкома медоданд, ки занашро ба Фёдор гузашт кунад?

Платон мебарояд, шишачаи дору ва пиёлаи обро медиҳад.

Васил Биков

 СОТНИКОВ

I

 Онҳо аз роҳи хилват ва барфпӯши ҷангал мерафтанд, ки дар он аллакай аз нақши суми асп, лезаки чана ё пои инсон ҳатто асаре намонда буд. Аз ин ҷо, эҳтимол, дар тобистон ҳам кам мегузаштанд, ҳоло бошад, пас аз бӯронҳои дуру дарози моҳи феврал ҳамаро барф пӯшида буд ва агар ин ҷангали дарахтони сӯзанбарг ва хадангзор намебуд – вай ба ду тараф каҷу килеб ақиб рафта, шабона як роҳрави хираравшан мекушод – роҳ будани онро фаҳмидан душвор мешуд. Ҳар чӣ ҳам бошад, онҳо хато накарданд. Рыбак аз байни буттаҳои урён ва дар оғӯши торикӣ монда, он ҷойҳоеро, ки тирамоҳ дида, дар хотир нигоҳ дошта буд, торафт бештар мешинохт. Он вақт ӯ ва боз чор нафар аз гурӯҳи Смоляков  аз ин роҳ гузашта, ба умеди ягон хел хӯрокворӣ ба даст овардан, ба сӯи хутор мерафтанд. Ана, ҳамон ҷаричаи шинос, ки онҳо се кас дар лабаш нишаста, бехавф будани ҳаракати дигаронро, ки бояд он ду нафари пештар рафта бо ишора хабар медоданд, мунтазир шуда, тамоку мекашиданд. Акнун ба ҷарича фуромада намешуд: барфе, ки бӯрон рӯфта оварда буд, аз лаби он бомгӯша барин ба поён овезон шуда, дар нишебии ҷарича дарахтони урён то худи нӯгашон ба барф ғӯтида буданд.

2

Дашт назар ба ҷангал боз ҳам хунуктар буд, аз рӯ ба рӯ шамоли на он қадар сахт, вале хунуки сӯзон мевазид, ки аз он дастони бедастпӯшак ба дарду сӯзиш медаромаданд. Сотников онҳоро ҳар қадар гоҳ дар кисса, гоҳ дар остин, гоҳ дар бағал андозад ҳам, боз хунук мехӯрданд. Дар ин ҳол ва махсусан, гӯшҳоро зуд хунук занондан хеле осон буд ва Сотников аз дард рӯй турш карда онҳоро ба остини моҳутии шинел молиш дод. Ӯ аз пойҳояш хавотир набуд: онҳо аз роҳравӣ гарм мешуданд. Дуруст аст, ки ду панҷаи сармозаи пои росташ карахт шуда, чизеро ҳис намекарданд, вале онҳо пештар ҳам доимо аз хунукӣ карахт шуда дар гармӣ ба дард медаромаданд. Вале ҳоло дар ин хунукӣ ҳама аъзои бадани шамолхӯрдаи ӯ ниҳоят тоқатшикан дард карда, илова бар ин боз ба ларза даромад.