Ин сарвари фарҳехта физики азим аст,

Дар шеъру адаб низ варо завқи салим аст.

Аз дониши таъриху забонаш сухане нест,

Донои ҳама илми навин асту қадим аст.

Шеър баски нест ҳаргиз ҷамъ ё ҷанги сухан,

Зинда бошад шоире, ки мирад аз нанги сухан.

Хотире аз пеши худ рангинсухан кай оварад,

Баски рангомезии даврон бувад ранги сухан.

Обҳое бешу кам аз сар гузашт,

То ки қадри оби пеши дар гузашт.

Тарҷрибат омӯхт моро зиндагӣ,

Илмаш аз сад мактабу дафтар гузашт.

Ҳар шабе аз дур ёдат мекунам,

Нохушу масрур ёдат мекунам.

Ишқи мо буд ошкорову кунун,

Чун ғами мастур ёдат мекунам.

Бо туям танҳо ба танҳо маҳфил аст,

Бе туям бо ҳар ду дунё мушкил аст.

Гар ту хандонӣ ба рӯёрӯйи ман,

Зиндагонӣ хандарӯю муқбил аст.

Бенуру хира метофт шабҳо ситораи ман,

То чун ситора кардӣ боре назораи ман.

Аз шуълаи нигоҳат барқе ба ҷони ман зад,

Сад Каҳкашон шукуфо  шуд ҳар канораи ман.