Дар пойи озодӣ аз пой уфтодем,

Озоди побандем, побанди озодем.

Мо куштаи зинда, мо зиндаи кушта,

Мо доди бедодем, бедодэҷодем.

Ҳамчу ҷоми тиҳӣ аз май кӯча шомгаҳон холист,

Бешароб чӣ бошад ҷом, ҷоми кӯча ба ин ҳолест.

На суруд, на оҳанге, на садои дафу чанге,

На ғиреви сияҳмасте, к-ин чӣ майкаши муҳтолест.

Обҳо гаштанд хунин, хок з-оташ дар гудоз аст,

Гул нарӯяд з-оташу хун, оби раҳмат чорасоз аст.

Оштию раҳми гургон ҷуз вале гургоштӣ нест,

Мешҳоро инқироз аст, гургҳоро имтиёз аст.

Пагоҳ офтобро нидо кунам,

Вале чӣ сон варо дар ин саро кунам,

Ки гӯшае барои офтоб нест,

Ба сад ҷаҳон агар сару садо кунам.

Чӣ кунам ба номи ҷовид, ки зи худ нишон гузорам,

Ки ман аз ҷаҳони ҷовид ғами ҷовидона дорам.

Чӣ ҷаҳон, ки ормонаш сари дор дидани мост,

Ва хуш аст, агар чу Ҳаллоҷ бикашад ба ҳалқа корам.

Паём аз ишқ мехоҳад дили шайдои ман имшаб,

На танҳо дил, ки мехоҳад ҳама аъзои ман имшаб.

Дилу ҷонам ҷудо мехоҳаду ҳам даст, ҳам бозу,

Ки худ пайдо чӣ мехоҳад зи нопайдои ман имшаб.