Ғ. Ғиёсванд

 «Чӣ кунад бенаво, ҳамин дорад?»

 Охирин навиштаамро ба муносибати мусофирати донишманди арҷманд ҷаноби дуктур Аскар Ҳаким ба Пуртланди Амрико барои ёдбуд ба ҳузурашон тақдим медорам.

АСИРИ ДИЛ

Дило, як дам ту бар ман гӯш медор,

Ба умрам ҳар чӣ гуфтӣ, гӯш кардам.

Биё аз хоби ғафлат шав ту бедор,

Бубин, заҳре, ки додӣ нӯш кардам.

Усмон Олим

БАРОИ УСТОД АСКАР ҲАКИМ

Роздонаш, ки ниёи ховар аст,

Хизрдонӣ пешаи Искандар аст.

Мирзо Файзалӣ,

Шоири халқии Тоҷикистон

 БА АСКАР ҲАКИМ,

ШОИРИ ХАЛҚИИ ТОҶИКИСТОН

 Ӯ на танҳо шоир асту олим аст,

Дилқавӣ, инсони зӯру солим аст.

Шеър – олӣ, лаҳн – ширин, хулқ – хуш,

Қитъае аз шеъриятро ҳоким аст.

Нурмуҳаммад Ниёзӣ,

Шоири халқии Тоҷикистон

 Аскаре дар қаламрави шеър аст,

Бо қалам мекунад силаҳдорӣ.

Бо равонсӯзию сухансозӣ

Ӯ Ватан мекунад нигаҳдорӣ.

 МИСРАЪҲОИ ПУРИЛҲОМИ ШОИР

 Дар баландтарин кӯҳҳо, дар он ҷое, ки гӯё аз об нишоне нест, амиқтарин, тозаву булӯринтарин чашмаҳо меҷӯшанд. Дар чунин ҳолатҳо, ҳамчунонки дар шеър аст, баландӣ аксаран мутаносиби амиқист. Парвози баланди қуллаҳои асроаср ҷовидони сухан ҳамчун Рӯдакӣ, Фирдавсӣ, Хайём, Мавлавӣ, Ҳофиз дар жарфои зиндагӣ, эҳсоси миллии ҷаҳоншиносӣ, рӯҳу равон, фарҳанги халқ решаҳои амиқ дорад.

 Бишнав, эй Илҳом, ин ҳарфу сухан!

Ҳам зи ту мехоҳам, эй ақли наҷиб,

З-он чӣ дидам, кун музайян шеъри ман, – 

чунин мегӯяд сухансарои бузурги қарни чаҳордаҳи Флуронси Итолиё – Данте Алигери дар шоҳасари худ «Мазҳакаи илоҳӣ». Алҳақ, олиҳаи Илҳом ба имдоди шоири нобиғ а расида, куллияи он чиро ки ӯ ба шарофати ақли наҷиби хеш мушоҳида кардаву дида, ба пироҳани шеъри гаронмоя ва баландпояаш тарҳҳои ҷовидонӣ ва зебо кашидааст. Бузургони олами шеъру фарҳанг Дантеро дар силки номҳои мардони бонубуғ ат – Ҳомер, Фирдавсӣ, Шекспир ва Рафаэл мансуб донистаанд. Аз ин силсила сарнавишти Данте ва сухангустари Тӯсӣ то дараҷае ба якдигар монандӣ дорад. Ҳар дуи ин шоирони вологуҳар дар зиндагӣ таҳти таъқиб қарор доштаанд ва аҷибаш он ки ҳар ду ҳам бо як асари худашон – шоири итолиёвӣ бо «Мазҳакаи илоҳӣ» ва ҳаким Фирдавсӣ бо «Шоҳнома» дар сафҳаи офоқ умри безаволӣ ёфтаанд…