Навиштае ба зери сурати рассоми арман Мартирос Сарян ва Паруйр Севак, ки дар он шоир дасти рассоми 90-соларо бо эҳтиром мебӯсад.

Магар гулҳо ба рӯйи бому дарҳо

Барои хотири булбул шукуфта.

Ба девору ба гулдону ба саҳро

Надонам доғи ту ё гул шукуфта.

Тифл мерӯяд зи раҳми модараш,

Мекашад модар чу дунё дар бараш.

Баъд инсон хешро меофарад

Борҳо бо ранҷ дар умри сараш.

Ҳамчу бори куҳан ба пуштаи деҳ

Мондааст ин аробаи вайрон.

Чархҳояш ба хок рафта фурӯ,

Соғу афтода як тараф ҳайрон.

 Бо ҳазорон чашми ахтар кард пири дидавар

Ҳар шабе бар осмону бар замин, бар худ назар,

То чу аз ақли амиқе ё зи эҳсоси баланд

Ин заминро хонд ӯ гаҳвораи насли башар.

Рӯзҳо бошитоб мегузаранд,

Бо гуноҳу савоб мегузаранд.

Мо ҳама дар ҳисоби насяву нақд,

Рӯзҳо беҳисоб мегузаранд.

Мекушоям болҳои хешро,

Давр дар чархи мудаввар мезанам.

Чун манам аз доначинӣ бениёз

Дар фарози осмон пар мезанам.