Ба зери осмон як осмони дигаре хоҳам,

Фазои синаҳоро Каҳкашони дигаре хоҳам.

Ба инсони фалакгарде, ки тасхири малак кардаст,

Ба тасхири худӣ акнун тавони дигаре хоҳам.

Чу мебинам баҳори осмонҳои ту беранг аст,

Ба ту рангинкамон, абрӯкамони дигаре хоҳам.

Агар ҷони ҷавони хешро дар ишқ месӯзӣ,

Ба ту ҷони ҷавони ҷовидони дигаре хоҳам.

Агар гардун ҷабин бар остони ту намесояд,

Ба ту як ошёну остони дигаре хоҳам.

Касе ҳаргиз нашуд дар зодбуми хеш пайғамбар,

Ба ту тамкину таскину ҷаҳони дигаре хоҳам.

Чу дар чашми ҷаҳонбинат ҳама рози ҷаҳон пайдост,

Ба ту як олами дар худ ниҳони дигаре хоҳам.

Агар дар рӯзгорон вақт доим қаҳрамон будаст,

Барои вақт акнун қаҳрамони дигаре хоҳам.