Агар ёриву ноёрӣ, Худо ёрат, Худо ёрат,

Гар орӣ ёд ё н-орӣ, Худо ёрат, Худо ёрат.

Вале то роз гӯям ман шаби маҳтоб бо маҳтоб,

Барам шабро ба бедорӣ, Худо ёрат, Худо ёрат.

Гарат шеърам нагирад ҳам, аё ширинтар аз ҳар шеър,

Маро ту шаҳди ашъорӣ, Худо ёрат, Худо ёрат.

Агар дар чашми ту ман нопадидам, бар ман аммо ту

Ба барги гул падидорӣ, Худо ёрат, Худо ёрат.

Намеоиву рӯйи чашмӣ, аммо ман, ки меоям,

Зи чашмам дур медорӣ, Худо ёрат, Худо ёрат.

Ба хушкии хазонрезам сиришки навбаҳоронро

Маро аз дида меборӣ, Худо ёрат, Худо ёрат.

Бинои ишқи безинҳор ҳарчандам фурӯ резӣ,

Варо танҳо ту зинҳорӣ, Худо ёрат, Худо ёрат.

Аё дер омада, дар зудрафтанҳои лотаъхир,

Ту танҳоям нигаҳдорӣ, Худо ёрат, Худо ёрат.

Дар ин даҳри пур аз озор чӣ монад зи кас осор,

Агар озору осорӣ, Худо ёрат, Худо ёрат.

Ҳама он гуфтаву ногуфтаам аз ту, дуо дорад,

Ки гар ёриву ноёрӣ, Худо ёрат, Худо ёрат.

                                                            03.06.2019