Навбаҳор омаду айёми гулу гулбасарон,

Ҳамчу гул гашт шукуфо нигаҳи гулнигарон.

Остин барзадаву соқ чу урён кардӣ,

Бӯса бар дасти ту доданд ҳама симбарон.

Дид чашм ин ҳамаву, лаб ки ба соқат нарасид,

Дили мо хун шуду зад худ ба сафи хунҷигарон.

Чеҳраи мо, ки зи дилхунии мо рангин шуд,

Рашк бурданд ба хуниндилии мо дигарон.

Магар аз ҳусни баҳори рухи гулгун ояд

Ғайри гул ҳеҷ чӣ дар дидаи соҳибназарон.

Эй,чӣ хуш, ақл ба гулбоди баҳорат додем,

Баски дар барги рухат ақл бувад бори гарон.

Ду ҷаҳон садқаи як лаҳза ба сар бурдани мост,

Кай шиносанд чунин бахти ҷавон бебасарон.

Қулзуми талхи ҷаҳонро ба асал кард бадал

Зарраи лутфи дурӯғ аз лаби ширинасарон.

Ҳар чӣ имрӯз ба паймонаи мо резад ёр,

Шавкарон ҳам бувад, аз ишқ шавад гулшакар он.

                                                            08.03.2020