Манзилороӣ чӣ кор ояд, дилороӣ бикун,

Аз худороӣ чӣ ҳосил, маҳфилороӣ бикун.

Аз зару симу булӯр равшан нагардад чашми кӯр,

Чашми дил з-инҳо бубанду чашмбиноӣ бикун.

Танпарастон оқибат миранд зери бори тан,

То намирӣ чун таносо, рав дилосоӣ бикун.

Дил агар бедор набвад, чашмводорист ҳеҷ,

Чашми дилро во намо в-аз сина овое бикун.

Аз ҷаҳонҷӯйӣ нахоҳӣ гашт дилҷӯйи ҷаҳон,

Баҳри таъмири ҷаҳон андешаву рое бикун.

То кушоӣ қуллаҳои сарбаланде дар замин,

Кӯҳпаймоӣ бимону рӯҳпаймоӣ бикун.